ROXAS CITY — Nagapati ang Capizeño criminal lawyer kag anay katapo sang Philippine Constabulary nga si Atty. Nelson Borja nga malabo nga paboran sang Korte Suprema ang ipasaka nga motion for reconsideration sang mga nagapetisyon batuk sa deklarasyon sang Martial Law sa Mindanao.
Suno Borja, natul-id sang Korte Suprema nga may matuod kag nagakaigo nga balasehan ukon factual basis ang Proclamation No. 216 ni Pres. Rodrigo Duterte nga nagpaidalum sa bilog nga rehiyon sang Mindanao sa Martial Law.
Ginpaathag sang kilala nga criminal lawyer nga mahimo lamang mabaliskad sang Korte Suprema ang ila nauna nga desisyon kun dikit ang resulta sang pagbinotohay kag may mapresentar nga bag-o nga ebidensiya ang mga nagapetisyon.
Mahibaluan nga sa ginpaguha nga desisyon sang pinakamataas nga hukmanan 11 diri ang nagboto pabor sa deklarasyon, 3 ang naghambal nga dapat sa Marawi lamang ipatuman ang Martial Law kag isa lamang ang nagpamatok.
Ginpahayag ni Borja nga ginalauman na sadto nga paboran sang Korte Suprema ang deklarasyon bangud maathag nga may nagakahinabo nga rebelyon sa Marawi City kun sa diin ginatos na ang nagkalamatay sa engkwentro sang tropa sang gobyerno kag terorista nga Maute group samtang linibo na ang nagbakwit bangud sa kinagamo.
Nagapati man si Borja nga may lamud pamulitika na ang rason sang mga nagapetisyon nga nagapamatok sa deklarasyon sang presidente.
