Ginumpirma sang Department of Foreign Affairs (DFA) sining Miyerkules, Mayo 7, nga wala sang Pilipino nga napatay sa ginhiwat nga airstrikes sang India sa Pakistan.
Suno sa DFA, padayon nila nga ginabantayan ang sitwasyon sa tunga sang India kag Pakistan kag nagapanawagan sang matawhay nga resolusyon sa kinagamo.
Ginkumpirma man sang Embahada sang Pilipinas sa Islamabad nga hilway ang mga Pilipino sa mga apektado nga lugar.
Kasunod sang airstrikes nga ginatawag sang India nga “Operation Sindoor,” nga nagtarget suno sa mga pasilidad sang terorista, ginreport sang militar sang Pakistan nga 26 ka sibilyan ang napatay.
Gin-advisan sang embahada ang mga Pilipino nga likawan ang pagpanglakaton sa bahin sang Bhimber City, Azad Kashmir, Sialkot Line of Control, kag mga lugar nga lima ka milya halin sa border sang India kag Pakistan.
Ginsiguro ni DFA spokesperson Ma. Teresita Daza nga wala sang Pilipino sa Bhimber kag Azad Kashmir.
Sa report sang ahensya yara sa 3,151 ka Pilipino ang yara sa Pakistan, kalakip na ang mas ukon menus 30 ka Pinoy sa Sialkot, nga malapit sa Jammu border.
Kadam-an sa ila ang may asawa ukon pamilya sang mga Pakistani.
Samtang, may ginbanta nga 3,350 ka Pilipino naman ang yara sa India.
Matandaan nga ginhiwat sang India ang airstrike matapos ang pagpatay sa masubra 20 ka sibilyan, nga kadam-an amo ang turista sang mga terorista nga Kashmir sadtong nakaligad sang bulan, kun sa diin gintudlo sang India ang Pakistan bilang responsable sa makahalanusbo nga insidente nga gilayon naman nga ginpanginwala sang Islamabad.
