Nagakabalaka ang Department of Foreign Affairs sa nagadamo nga numero sang mga Filipino nga biktima sang human trafficking nga na-trap sa mga scam centers sa bug-os nga Southeast Asia.
Suno sa ahensya, makaalarma ang kaangay nga mga report apang sa pihak sini, wala gintumod sang ahensya kun pila na ka report ang ila nabaton.
Bilang sabat, ginpahayag sang ahensya nga nagakooperar na sila sa ila mga kaiping nga pungsod kaangay sang Mainland Southeast Asia nga ginalakipan sang (Thailand, Myanmar, Lao PDR kag Cambodia).
Nagpasalig man ini nga buligan ang mga Pilipino nga yara sa kalisdanan samtang nagakoordinar sa iban nga pungsod agud magkooperar sa Pilipinas.
Ginhatagan pagtamod sang DFA nga nagapabilin ini nga komitido sa pagluwas kag pagpapauli sa tanan nga Pilipino nga biktima sang Human Trafficking.
Nagpanawagan man ini sa tanan nga mga Pilipino kag overseas communities nga suportahan ang mga pagtinguha sang gobyerno sang Pilipinas agud matapna ang tanan nga sahi sang illegal recruitment kag pagpanghimulos.
