MANILA-Ginapangitaan paagi sang Department of the Interior and Local Government ukon DILG sang conditional amnesty para sa mga tag-iya sang loose firearms ukon mga armas nga wala rehistro, basta wala ini nadalahig sa bisan ano nga krimen.
Ginpahayag ni DILG Secretary Jonvic Remulla ang panukala sa presentasyon sang budget sang ahensya sa Senate Committee on Finance sang Huwebes. Suno kay Remulla, mahimo ini nga paagi agud mahibaluan kag ma-account sang mga awtoridad ang kadam-an sang wala rehistro nga armas nga nagalapta sa mga komunidad.
Sa idalom sang panukala, pagasusi-on anay sang mga awtoridad ang mga armas nga isurrender agud mahibaluan kon ginagamit ini sa paghimo sang krimen. Ang mga armas nga mapamatud-an nga wala nadalahig sa krimen amo ang mahimo mapasakop sa amnesty.
Samtang, ginbalik ni Remulla ang iya panawagan sa Kongreso nga repasuhon ang Republic Act No. 8294, ukon ang kasuguan nga nagpatuman sang mas magaan nga silot para sa illegal nga paghupot sang armas kag nagtugot nga mahimong piyansa ang amo nga kaso.
Suno sa kalihim, ang pagpabaskog sang silot mahimo makabulig sa pagdakop sang mas madamo nga mga persona nga ilegal nga nagahupot sang armas. Ginsiling man niya nga posible maglab-ot sa 150 mil ang madugang nga mga persona nga madakop kon pagahugtan pa ang kasuguan batok sa illegal possession of firearms.
Ginpahayag ni Remulla nga nagasulod ang loose firearms sa mga komunidad paagi sa nagkalain-lain nga pamaagi, lakip na ang lokal nga paghimo sang armas kag ilegal nga pagpasulod sini paagi sa mga lugar sa baybayon nga mahapos malab-otan.
Nagapanawagan si Remulla sang mas mabaskog nga mga tikang batok sa loose firearms, ilabi na matapos ang sunod-sunod nga mga insidente sang pagpamusil nga nagalakip sa mga pamatan-on. Lakip sa mga panukala ang paghimo sang illegal possession of firearms nga indi puede mapiyansahan, nga may silot nga tubtob 20 ka tuig nga pagkabilanggo.
