-- ADVERTISEMENT --

Ginhatagan pagtamod sang General Alliance of Workers Association (GAWA) ang importansya sang transparency kag accountability sang gobyerno sa paggamit sang pundo sang publiko nga ginpain para sa ASEAN Summit 2026.


Sa interview sang Bombo Radyo kay Wennie Sancho, Secretary General sang GAWA, iya ginpahayag nga dapat ipaguwa sang gobyerno ang kumpleto nga detalye sang paggasto sa nasambit nga international event, partikular kun lubos nga nagamit ang gin-alokar nga P22.9 billion nga pondo.


Suno kay Sancho, may kinamatarong ang publiko nga mahibaluan kun sa diin nagkadto ang daku nga kantidad sang kwarta sang publiko, kun pila ang aktwal nga nagasto kag kon may nabilin nga pondo pagkatapos sang summit.

Sa tion nga may yara sang sobra nga badyet, ginaduso nga isaylo ukon ipain ang amo nga pundo sa mga ahensya sang gobyerno nga nagakinahanglan sang dugang nga suporta, partikular sa mga serbisyo nga direkta nga nagabulig sa mga pumuluyo.

Ginklaro ni Sancho nga importante para sa Pilipinas nga batunon sang husto ang mga dumuluong nga bisita kag himuon nga madinalag-on ang isa ka daku nga pagtililipon kaangay sang ASEAN Summit, apang dapat man ikonsiderar sang gobyerno ang spending limits kag siguraduhon nga indi mausik ang kwarta sang pumuluyo.

-- ADVERTISEMENT --

Magluwas sini, indi lamang ang madinalag-on nga paghiwat sang internasyonal nga kahiwatan ang dapat hatagan sing igtalupangod kundi pati man ang nagakaigo nga paggamit sang pondo, pagkabukas sa publiko kag salabton sang mga opisyales sa tagsa ka gasto nga nahimo.