CAPIZ- Nagapadayon ang gobyerno sa mga tikang agud masolbar ang problema sa insurhensya sa probinsya sang Capiz pamaagi sa mga programa nga nakasentro sa pagpaayo sang sitwasyon sang mga lokal nga komunidad kag sa pag-angkon sang mas mataas nga kooperasyon gikan sa mga gobyerno-lokal.
Sa interview sang Bombo Radyo kay Erwin Bonifacio, Chief sang Project Development and Monitoring Section sang Department of the Interior and Local Government (DILG), iya ginpakigbahin ang mga programa kag tikang sang ahensya agud mahatagn sang igtalupangod ang mga isyu sang insurhensya kag padayon nga pagpabaskog sang seguridad sa rehiyon.
Suno sa iya, ang DILG may yara sang mga inisyatiba kaangay sang Enhanced Comprehensive Local Integration Program (E-CLIP), nga nagatuyo nga maghatag sang bulig kag tyansa para sa mga anay nga myembro sang mga rebelde agud liwat nga mangin madinalag-on kag magbag-o ang kabuhi sa ila tagsa ka mga komunidad. Ang programa nga ini ginakalakipan sang mga livelihood assistance, pagpaubra sang mga kabalayan, kag iban pa nga mga serbisyo pang-sosyo-ekonomiko.
Ginhatagan man pagtamod ni Bonifacio ang importansya sang pagbinuligay sang DILG sa mga lokal nga gobyerno agud mapaayo ang implementasyon sang mga programa nga may kaangtanan sa peace and order. Importante suno sa iya ang aktibo nga partisipasyon sang mga lokal nga opisyal sa pagtutok sa mga nagapanguna nga isyu sang tagsa nila ka mga komunidad.
Isa man sa mga stratehiya sang DILG amo ang pagpalapad sang mga inisyatiba nga nakasentro sa edukasyon, ikaayong-lawas, kag mga imprastruktura. Wala man malipatan ni Bonifacio nga isambit ang papel sang bug-os nga komunidad sa pag-angkon sang isa ka mapag-on nga kalinong.
Sa pihak sang mga pagpanghangkat, padayon ang gobyerno sa pagpatigayon sang mga tikang agud masiguro ang kalinong kag seguridad sa Capiz, kag sa bug-os nga pungsod, pamaagi sang madalom nga koordinasyon kag mga epektibo nga programa nga nakatutok sa mga ugat sang insurhensya.
Interviewed by Bombo Sunnie Mae Batencila
