ROXAS CITY -Ginapakamala-ut sang Brotherhood of Riders-Capiz Chapter ang pagpaguwa sang Implementing Rules and Regulation (IRR) sang Land Transportation Office (LTO) natuhoy sa pagpatuman sang Doble Plaka sang mga motorsiklo sa tunga sang ginapangatubang sa karon nga coronavirus disease (COVID-19) pandemic.
Ini ang ginpahayag ni Chap-Rider Russel Monton Ban, presidente sang nasambit nga grupo sang mainterview sang Bombo Radyo.
Suno kay Ban nga wala gintun-an sang LTO ang pagpatuman sang R.A. 11235 ukon Motorcycle Crime Prevention Act kun sa diin gina-require ang mga motorista nga magpahamtang sang duha ka mga plate numbers sa una kag sa likod sang motorsiklo.
Gindugang pa ni Ban nga indi solusyon ang mga plate numbers sang mga motorsiklo para matapna ang kriminalidad.
Nagalain man ang buot sang mga riders bangud dugang pa ini nga pas-anon sa ila ilabi na ang multa nga P100,000 sa mga madakpan nga wala nagasunod sa nasambit nga laye.
Gindugang pa gid ni Ban nga mabudlay sa bahin sang mga riders nga magdugang sang plaka bangud wala pa narelease sang LTO ang mga sang una pa nga mga plate numbers.
Samtang ginpahayag naman ni Ban nga may ginahimo na nga mga nakaigo nga tikang ang sektor sang mga motorista sa pungsod agud magpasaka sang panumbongon batuk sa LTO.
