Ginapadasig sang Department of Energy (DOE) ang implementasyon sang 22 ka renewable energy projects bilang sabat sa posible nga krisis sa gatong kag agud mapabaskog ang alternatibo nga supply sang kuryente sa pungsod.
Suno kay Claire Castro sang Presidential Communications Office, katuyoan sang gobyerno nga mabuhinan ang pagdepende sang Pilipinas sa imported nga gatong nga permi apektado sang pagsaka sang presyo sa pangkalibutanon nga merkado.
Sa isa ka press briefing sa Iloilo City, ginsiling ni Castro nga lakip sa ginapadasig nga mga proyekto sang DOE ang 12 ka solar, anum ka hydroelectric, duha ka biomass, isa ka wind project kag isa ka integrated renewable energy storage system.
Ginpabutyag man nga dako ang papel sang sini nga mga proyekto ilabi na sa tion sang oil crisis kun sa diin pabag-o-bag-o ang presyo sang produktong petrolyo nga makaapekto sa supply sang kuryente kag galastuson sang mga konsumidor.
Samtang, Pinaagi sa pagpalapad sang renewable energy, ginapaabot sang gobyerno nga magluwas sang mas mabakod, mas barato kag mas limpyo nga supply sang enerhiya sa bilog nga pungsod.
Dugang pa, ginakabig man sini nga maprotektahan ang ekonomiya sang Pilipinas batuk sa epekto sang pangkalibutanon nga krisis sa gatong.
