Nakahanda ang Department of Science and Technology (DOST) nga magpahulam sang ila marine equipment agud makuha ang ginaalegar bangkay sang mga nadula nga manugbulang sa Taal Lake.
Suno kay DOST Secretary Renato Solidum Jr., maga-coordinate sila sa iban pa nga mga scientists nga may mga kagamitan ukon instrumento nga mahimo magamit diri bangud may mga marine equipment nga ginapondohan sang DOST para sa marine monitoring.
Nakita sang tiglikom nga isa ka daku nga hangkat nga mahimo atubangon sa pagkuha sang posible nga mga bilin sang nadula nga mga sabungero amo ang partikular nga lokasyon sa Taal Lake sa diin mahimo nga ginhaboy ini.
Ginpahayag man sang hepe sang DOST sa isa ka press conference subong nga Sabado nga may posibilidad nga makuha pa ang mga tul-an sa Lake kun ginhaboy gid man didto ang mga bangkay bangud suno sa iya wala ini nadunot, kundi ang unod lamang.
Gin-athag sang opisyal nga ang decomposition rate sang mga nabilin ang nakadepende sa lokasyon sa linaw, sa diin suno sa iya kun wala na sang oxygen, maga-untat na ang decomposition sini kag mapreserbar ini.
Ginrekomendar man sang tiglikom nga gamiton ang mga kamera sa pagpangita sang mga bilin sa baylo nga magpadala sang mga divers agud magpangita sa idalom sang lake.
Ginhimo sang hepe sang DOST ang pahayag matapos ginbuyagyag sang whistleblower kag isa sa mga akusado sa kaso sang nadula nga sabungero nga si Julie “Dondon” Patidongan alyas Totoy nga ang mga nadula nga sabungero ang gindala sa Talisay, Batangas malapit sa Taal Lake kag ginapatihan nga ginpaantos kag ginpatay.
