ROXAS CITY – Ginahulat pa sang pamunuan sang Department of Public Works and Highways (DPWH) ang pondo nga pagagamiton para sa pagpatukod sang dormitory para sa mga frontliners kag medical personnel sa probinsiya sang Capiz.
Ini ang ginpahayag ni Engr. Julius Abela, ang hepe sang Maintenance and Construction Division sang DPWH Capiz 1st Engineering District sang mainterview sang Bombo Radyo.
Apisar wala ginpat-od ni Abela ang kabug-usan nga pondo para sa amo nga proyekto, ginpahayag sini nga ginahulat na lamang nila ini gikan sa DPWH central office.
Ang pondo ang ipaagi sa Fiscal Year 2020 General Appropriations Act ukon GAA.
Partikular nga mangin resipyente sang nasambit nga proyekto amo ang mga frontliners kag medical personnel sang Bailan District Hospital kag Roxas Memorial Provincial Hospital.
Mahibaluan nga una na nga ginpapasar sang Sangguniang Panlalawigan ang Resolution No. 325, series of 2020.
Ang amo nga resolusyon ang nagahatag sang otoridad sa gobyerno-probinsiyal sang Capiz nga magsulod sa isa ka Memorandum of Agreement (MOA) kaupod ang DPWH Regional Office 6 para sa nasambit nga proyekto.
Nasaad sa kasugtanan nga ang nasambit nga ahensiya ang magadihon sang plano, maga-preparar, maga-procure, contsurct kag magapanguna sa amo nga proyekto.
