ROXAS CITY – Ginkalipay ni Dr. Editha Alfon ang iya nga reappointment bilang presidente sang Capiz State University (CapSU).
Suno kay Alfon nga 8 ka miyembro sang Board of Regents ang nagboto pabor para sa iya nga reappointment sa amo nga posisyon.
Ginpahayag sini nga wala man ginbuksan ang amo nga posisyon kag siya gid lamang ang nagsumiter sang iya nga mga papeles kag dokumento para sa pag-evaluate.
Mahibaluan nga sa karon, magaserbisyo liwat si Alfon sang iya ikaduha nga termino nga magalawig sang apat ka tuig.
Ginpasalig man sini nga ilabi pa sini nga paayuhon ang iya pagdumala sa CapSU sa idalom sang iya nga liderato.
Sa pihak nga bahin, ginpahayag ni Alfon nga nag-isyu ini sang memorandum nga nagapaiway sa natalana kuntani nga pagbukas sang klase sang CapSU sa Setyembre 7, 2020.
Ginpahayag sini nga indi pa mapat-od sa karon kun san-o magabukas ang klase.
Nagsumiter pa sila sang Learning Continuity Plan agud malantaw ang kahandaan sang CapSU sa pagbukas sang klase subong nga may ginapangatubang nga pandemiya.
