ROXAS CITY – Ginapasiguro sang Department of Social Welfare and Development Region 6 nga wala sang may naga-guwa nga pondo nga sakop sang 10-day ban sa distribution sang cash grants sa idalom sang Assistance to Individuals in Crisis Situation (AICS) kag Ayuda Para sa Kapos ang Kita Program (AKAP).
Sa interview sang Bombo Radyo kay Therese Fely Legaste, Information Officer sang DSWD Region 6, iya ginpahayag nga ang medical kag burial assistance sa idalom sang AICS amo lamang ang ginpahanugotan sang Comelec sa pihak sang ayuda ban.
Suno kay Legaste, ang indibidwal nga nagapangayo sang medical ukon burial assistance ang gina-assess sang social worker kag ginalantaw ang ila mga dokumento agud makahatag sang available nga pondo.
Pahayag niya, magluwas sa medical ukon burial assistance, wala na sang ano man nga ayuda anay ang mahimo nga ihatag sang ahensya tubtob sa Mayo 12, 2025 bangud kinahanglan nga magsunod sa guidelines sang Commission on Elections.
Nahibaluan nga ang AICS ang isa sa mga social protection program sang DSWD nga nagahatag sang immediate kag temporary assistance sa indibidwal kag pamilya nga naga-eksperyensya sang krisis ukon kabudlay sa ila kabuhi.
Samtang ang AKAP ang isa man sa mga social welfare program sang ahensya nga nagahatag sang financial assistance sa indibidwal nga nagabaton sang manubo pa sa minimum wage sa diin sila ang labing apektado sa inflation.
