Ginpasangkad pa sang Department of Trade and Industry – Fair Trade Enforcement Bureau ang pagbantay sini sa mga ginabaligya nga iligal nga palupok bilang pagpreparar sa pagsaulog sang Bag-ong tuig.
Suno kay Fair Trade Enforcement Bureau Director Gino Mallari, mahimo sila nga mag-isyu sang cease and desist orders para sa mga manufacturer kag may ara naman nga ginapatuman ang Philippine National Police (PNP) nga special law sa kriminal nga aspeto sang mga paglapas.
Ginhimo sang opisyal ang pahayag bilang sabat sa mga apelar gikan sa legal firecracker manufacturers para sa mas hugot nga enforcement batuk sa pagbaligya sang mga indi sertipikado nga produkto nga ginapahayag nakaapekto sa ila nga pangabuhianan.
Ginpasiguro naman sang opisyal nga padayon sila nga nagakooperar sa PNP partikular na sa pagtipon kag paghatag sang impormasyon kun sa diin mahimo nga makita ang mga uncertified products.
Nagabulig naman ang DTI sa mga LGUs para sa pagpatuman sang mga ordinansa kag pagpahamtang sang mga lugar para sa display kag pagbaligya sang mga legal nga palupok.
