Natigayon na nga ma-install ang free WiFi sites sa 26 ka mga pampubliko nga lugar sa probinsiya sang Capiz kasubong sang ospital, state universities and colleges.
Kasunod sini ang pormal nga paglunsyar sang dugang nga 17 ka mga free WiFi sites sang Department of Information and Communications Technology (DICT).
Ginpahayag ni Engr. Lorwell Onglatco, provincial director sang DICT nga kalakip sa mga napahamtangan na sang free WiFi sites ang Capiz State University campuses sa Roxas City, Capsu Dumarao, Mambusao, Pilar, Pontevedra kag Sigma, Mambusao National High School, Maayon National High School, Teen Zone Tech4 Ed center sa banwa sang Pontevedra, 3rd Infantry Division sang Philippine Army, ospital sa Camp General Macario Peralta sa banwa sang Jamindan kag anay Tapaz district hospital sa banwa sang Tapaz.
May yara man sang free wifi access sa kapitolyo probinsiyal kag Roxas Memorial Provincial Hospital, Senator Gerardo Roxas Memorial District Hospital sa banwa sang Dao, Mambusao District Hospital kag Bailan District Hospital.
Suno kay Onglatco nga katuyuan sang programa nga magserbe nga tulay sang digital device labi na karon nga pandemya, kinahanglan nga ma-provide ang free internet access sa mga remote areas.
Nahibaluan nga kabahin ini nga programa sang nasaad sa RA 10929 ukon Free Internet Access in Public Places Act.
