ROXAS CITY-Natalana nga pasakaan sang nagakaigo nga panumbongon ang duha ka mga construction workers nga ginatudlo sang suspek sa pagbuno patay kay Punong Barangay Ruben “Godo” Fuentes sa sulod sang isa ka KTV Bar sa Mckinley Street Barangay III, Roxas City.
Sa interview sang Bombo Radyo Roxas kay Police Master Sergeant Ramil Arcangeles, tagpamaba sang Roxas City Police Station ginpahayag sini nga ginahulat na lang sa karon ang death certificate ni Punong Barangay Ruben Fuentes agud mapasaka ang nagakaigo nga panumbongon batuk sa mga suspek nga sanday Virgilio Vigor sang Janiuay Iloilo kag Joseph Jamora sang Oton, sa amo man nga probinsiya.
Suno kay Arcangeles nga panumbungon nga homicide kag frustrated homicide ang natalana nga igapasaka sang mga kapulisan sa City Prosecutors Office batuk sa duha ka mga suspek.
Nagpasalig ini nga pagatinguhaan nga mapasaka sang mga kapulisan ang nasambit nga mga panumbungon pinaagi sa inquest proceedings subong nga adlaw.
Samtang ginkompirmar naman ni Arcangeles nga anay preso kag may mga nauna na nga ginbuno kag ginpatay ang suspek nga si Vigor sandig sa pagpangusisa sang mga kapulisan sa background sang amo nga suspetsado.
Suno sa opisyal nga sadto anay nagpangatubang man sang amo nga panombongon ang suspek nga si Vigor matapos nga may yara man sang ginbuno sa bahin sang Mindoro.
Magluwas diri, may yara man ini sang ginbuno nga tatlo ka mga biktima kun sa diin isa diri ang ginapahayag nga ginbawian sang kabuhi sa bahin sang Miag-ao, Iloilo.
Samtang naga-amat amat na padulong sa isa ka punerarya sa siyudad sang Roxas ang mga kaupdanan ni Fuentes sa Liga nga mga Barangay sa Roxas City agud magbisita sa iya nga haya.
Suno sa pagpangusisa sang Bombo Radyo, nakapadulong na sa punerarya si City Councilor Jericho Celino kag Punong Barangay Arturo Aragon Sr. sang Barangay Cagay, sining siyudad.
