ROXAS CITY – Lunsay ‘symptomatic’ cases ukon nakitaan sang sintomas sang coronavirus disease (COVID-19) ang duha ka mga locally-stranded individuals nga nagpositibo sa nasambit nga balatian sa banwa sang Panitan, Capiz.
Ini ang ginkompirmar ni Municipal Health Officer Dr. Rosine Delfin Avelino sang mainterview sang Bombo Radyo.
Isa diri amo ang 64 anyos nga babaye gikan sa Caloocan kag Tondo, Manila nga residente sang Barangay Intampilan, sang nasambit nga banwa.
Sadtong Hulyo 18 sang nag-abot ini sa banwa kag gin-facility quarantine sa Temporary Treatment Monitoring Facility (TTMF).
Hulyo 22 sang ginpaidalom ini sa real-time polymerase chain reaction (RT-PCR) test kag Hulyo 24 nagguwa ang resulta nga positibo ini.
Ang isa naman ang naga-edad sang 31 anyos nga babaye nga gikan sa Makati City, Metro Manila nga residente sang Barangay Cogon, sang nasambit nga banwa.
Sadtong Hulyo 18 ini nag-abot sa banwa kag gin-quarantine man sa TTMF.
Sadtong Hulyo 22 ini ginpaidalom sa RT-PCR test kag nag-positibo ini base sa ginpaguwa nga resulta sadtong Hulyo 24.
Bangud lunsay gina-ubo ang duha ka mga pasyente, gilayon sila nga gindala sa Roxas Memorial Provincial Hospital agud ipaidalom sa hospital quarantine.
Ginklaro man sini nga wala nakaguwa sa quarantine facility sang banwa ang duha ka mga pasyente kabaliskaran sa nagalapta nga mga istorya nga nakalagaw pa ang mga ini antes nagguwa ang resulta sang ila swab tests.
Sa karon suno kay Avelino, may yara pa sang kapin 10 ka mga LSI’s kag 13 ka mga Returning Overseas Filipino’s (ROF’s) sa TTMF sang banwa sang Panitan.
