BANGKOK, THAILAND– Liwat nga magasabak sa One Championship ang duha ka mga Filipino MMA fighter nga sanday Jean Claude Saclag sang Team Lakay kag Marwin Quirante sang AJJ Sprawl.
Makaatubang ni Saclag si Turkmenistani MMA fighter Shazada Ataev sa idalom sang flyweight division, samtang makasumpong naman ni Quirante ang bagito nga Russian fighter nga si Torepchi Dongak sa idalom sang strawweight division.
Ang sambuwa sang duha magadugay sang tatlo ka rounds.
Madumduman una nga nakatalana ang sambuwa sang duha ka Pinoy sang tinalikdan nga Marso 28, apang gin-kanselar bangud sa makusog nga linog nga natabo sa Myanmar kag Thailand nga nagpatay sa ginatos ka mga tawo.
Sanday Saclag kag Quirante ang duha sa mga bagito ng MMA fighter sang pungsod nga ginalauman makakuha sang dugang nga One Championship exposure bangud sa impresibo nga performance sa mga nagligad nga sambuwa.
Sa ulihi nga hampang sang duha, lunsay napakita nila ang unique martial arts style kag nahimo pa nga ginlutos ang tagsa ka mga kontra sa mga dalagkuan nga MMA fighter sa iban nga pungsod.
Natalana nga ipatigayon sa Mayo 23 ang sambuwa sang duha ka mga Pinoy fighter sa Lumpinee Stadium sa Bangkok, Thailand.
