Pilason ang duha ka mga tricycle driver matapos ang natabo nga pagpangluthang kag pagpangbuno sa Barangay Lawaan, Roxas City.
Ang biktima amo si alyas Norwel 43-anyos kag residente sang nasambit nga lugar samtang ang suspek naman amo si alyas Steph’ 37-anyos kag residente naman sang Brgy. Culajao. Roxas City.
Sa interview sang Bombo Radyo kay Police Lieutenant Rogelio L Tomagtang Jr., Officer in Charge sang Roxas Component City Police Station, iya ginpahayag nga nag-umpisa ang insidente sang gin-agda sang biktima ang suspek nga mag-inom-inom.
Apang sang ulihi, nag-init ang ila estoryahanay nga nagresulta sa pagbinaisay.
Dugang pa nga pagkatapos sang ila pagbaisay, naglakat ang suspek kag sa iya pagbalik hinali nalang ginluthang ang biktima sang makatatlo ka beses sa wala nga kamot.
Apang nakabalos ang biktima kag ginbuno ang suspek nga naigo naman sa wala nga abaga kag likod sini.
Bangud sini nag-angkon sang mga pilas ang duha kag gindala naman sa separado nga ospital para sa nagakaigo nga pagbulong.
Sa subong, padayon pa ang imbestigasyon sang kapulisan angut sa nasambit nga insidente.
