DAO, CAPIZ – Patay ang duha ka tuig nga bata matapos nahulog sa bubon sa Barangay Lacaron, Dao, Capiz.
Sa interview sang Bombo Radyo kay PCAPT Rian F. Ampoyos, Hepe sang Dao Municipal Police Station, base sa ila imbestigasyon, nagahampang sa ugsaran ang duha ka tuig nga bata kaupod ang magulang sini nga anom ka tuig samtang ang iloy nagadigamo sa ila puluy-an.
Apang samtang nagahampang ang duha, hinali lang natalupangdan sang magulang nga wala na ang iya duha ka tuig nga manghod kag dali-dali sini nga gintawag ang ila iloy kag ginhambalan nga nahulog sa bubon ang iya manghod.
Nahibaluan nga 10 metros ang kalayuon sang ila balay sa bubon kag wala sang tabon ukon kudal ang amu nga bubon. Gilayon man nga ginkadtuan sang iloy ang bubon kag sa una sini nga pagtsekyar wala makit-an ang bata.
Apang sang ginpanaugan na ang bubon didto kag nakita na ang duha ka tuig nga bata. Gintinguhaan pa nga salbaron ang bata kag gindala sa ospital apang gindeklarar nga dead on arrival.
Suno sa kapulisan, posible nga wala matalupangdan sang bata ang bubon bangud madamo ini sang hilamon sa palibot.
