SIGMA CAPIZ – Pilas sa magkatuhay nga parte sang lawas ang naangkon sang duha ka mga indibidwal, maapos ang nagluntad nga insidente sa tunga sang motorsiklo kag salakyan sa Barangay Parian, Sigma, Capiz.
Ginkilala ang drayber sang motorsiklo kay alyas “Edmar”, 48-anyos, kag backrider sini nga si alyas “John”, 43-anyos nga lunsay mga residente sang banwa sang Panay.
Samtang ang drayber sang pick-up nga salakyan ang ginkilala kay alyas “Leony”, 56-anyos kag residente naman sang Barangay Poblacion Takas, Cuartero, Capiz.
Sa interview sang Bombo Radyo sa Officer In Charge sang Sigma Municipal Police Station nga si PCPT. Mark Anthony Garcia, ginpahayag sini nga samtang ginasubay sang tagsa ka mga behikulo ang dalanon sa pareho nga direksyon nagikan sa banwa sang Sigma kag padulong kuntani sa syudad sang Roxas hinali lamang nga nag-overtake ang drayber sang pick-up sa ginasundan sini nga salakyan.
Suno kay PCPT. Garcia, lipod sa ihibalo sang drayber sang pick-up nga may motorsiklo sa unahan kabangdanan nga aksidente sini nga nabungguan ang motorsiklo nga nagresulta sa pagkatumba.
Bangud sa impact sang pagkabunggo, nag-angkon sang pilas sa lawas ang duha ka sakay sang motorsiklo nga gilayon naman nga ginrespondehan kag ginhatagan sang nagakaigo nga pagbulong sang rescue team.
Mahibaluan nga lunsay wala nakainom sang makahulubog nga ilimnon ang mga persona nga nagkalaulamid sa amu nga insidente.
Samtang, nakasugtanan sang magtimbang nga bahin nga i-settled na lamang ang natabo kag nagpromisa ang driver sang pick up nga pagasabton na lamang sini ang tanan nga galastuan medikal sang mga biktima.
