ROXAS CITY – Daku nga bulig ang Enhanced Comprehensive Local Integration Program (E-CLIP) kag ang masangkad nga strategic communications sang militar agud maangkon ang peace agenda nga ginahandom sang gobyerno.
Ini ang ginpahayag mismo ni Armed Forces of the Philippines (AFP) Chief of Staff General Benjamin Madrigal Jr. sang mainterview sang Bombo Radyo Roxas.
Suno kay Madrigal, kinahanglan lamang mahangpan sang mga miyembro sang komunista nga grupo nga indi sila pagpabay-an sang gobyerno kun pilion sang mga ini magbag-o kag magbalik sa sabak sang gobyerno.
Ang E-Clip amo ang flagship program sang Duterte administration nga nagaduso sang social healing kag national unity pinaagi sang whole-of-nation approach.
Mahibaluan nga ginpangunahan mismo ni Madrigal ang pagpirma sang Whole-of-Nation Commitment sa Region 6 nga ginpatigayon sa Camp Macario Peralta, headquarters sang 3rd Infantry Division – Philippine Army sa banwa sang Jamindan, Capiz.
Mahibaluan nga sa idalom sang Executive Order No. 70, natukod si Presidente Rodrigo Duterte sang National Taskforce nga ang mandato amo ang untaton na ang Communist Armed Conflict sa pungsod.
