Liwat nga magabukas sa bulan sang Nobyembre ang electronic visa (e-visa) application para sa mga Chinese visitors sa Pilipinas.
Sa statement sang Philippine Embassy sa Beijing, mahimo mag-apply sang eVisa ang mga Chinese applicants nga magabisita sa pungsod para sa tourism ukon business purposes kun magapabilin sila sa pungsod sa sulod sang indi magsobra sa 14 ka adlaw kag dapat ang point of entry yara sa mga airports kaangay sang Ninoy Aquino International Airport (NAIA) ukon Mactan-Cebu International Airport.
Bisan pa magtener ka sa pungsod sang kapin sa duha ka semana, mahimo ka mag-apply para sa isa ka naandan nga visa sa pinakamalapit nga mga Sentro sang Aplikasyon sa Visa nga pagabuksan sa Beijing, Chongqing, Fuzhou, Guangzhou, Hong Kong, kag Shanghai.
Para sa pagsumiter sang mga requirements, natalana nga ipagwa sang Embahada sang Pilipinas ang mga detalye sang e-Visa lakip na ang may kaangtanan nga website kag mga pamaagi.
Madumduman nga ginpauntat sang Pilipinas ang pag-isyu sang e-Visa sa mga Chinese tourists agud malikawan ang pagdamo sang illegal online gaming workers sa pungsod kasunod sang nabuyagyag nga mga krimen may kaangtanan sa Philippine Offshore Gaming Operators (POGOs) nga nagresulta sa pagkadakop sang madamo nga Chinese nationals.
Nahibaluan nga sang 2019, ang China ang ikaduha sa pinakadako nga source sang foreign tourists sa Pilipinas nga may 1.74 million.
