Kinahanglan nga seryosohon sang publiko ang mga ginapatigayon nga earthquake drill pagkatapos sang nagluntad nga 6.9 magnitude nga linog sa Cebu.
Sa interview sang Bombo Radyo kay OCD Region 6 Director Raul Fernandez, iya ginpahayag nga kinahanglan ang preparasyon sa kasubong sini nga kalamidad bangud indi mapaktan kun san-o ini matabo.
Suno pa kay Fernandez, normal lang nga mahadluk apang kinahanglan nga mangin maalam agud malikawan ang mga insidente sa tion nga may magluntad nga linog.
Pahayag pa niya, importante nga magkigbahin sa earthquake drill sa lugar ukon opisina agud mabal-an kun ano ang mga dapat himuon kag kun diin makadtu kun kinahanglan na nga mag-evacuate.
Dugang pa sang natungdan, magpati lamang sa mga lehitimo nga ahensya ukon organisasyon nahanungod sa mga impormasyon may kaangtanan sa linog kag iban pa nga kalamidad.
