Ginasaulog sa United Arab Emirates ukon UAE ang Eid’l Adha, nga isa sa pinakamabalaan nga okasyon sang mga Muslim.
Suno kay Bombo Soledad Frondosa, International Correspondent sa direkta sa UAE, iya ginpahayag nga bilang paghatag sang pagtamod sa amo nga okasyon, wala anay sang trabaho sa kalabanan nga bahin sang pungsod tubtob sa Domingo nga adlaw agud mahatagan sang tion ang publiko sa pag-obserbar sang Eid’l Adha.
Ginpahayag man sini nga kabahin sang selebrasyon amo ang pagpatigayon sang community prayer sa mga mosque kag iban pa nga lugar agud magpangamuyo.
Dugang pa niya nga kalabanan sa naga-upod sa pangamuyo amo ang mga lalaki nga Muslim nga aga pa nagapadulong sa mosque.
Ang Eid’l Adha isa ka importante nga pagsaulog para sa mga Muslim bilang simbolo sang pagtuo, sakripisyo kag pagpasalamat.
