Natalana nga ipatuman sa mga komunidad ang implementasyon sang Enhanced Curfew Hours para sa mga pamatan-on nga naga-edad 18 anyos panubo.
Suno kay Department of Interior and Local Government (DILG) Secretary Juanito Victor ‘Jonvic’ Remulla, kon ang mga pamatan-on sa sini nga edad ang madakpan sa dalanon pagkatapos sang alas 10:00 sang gab-i, dapat magpakita sila sang pamatuod nga nagaeskwela sila sa sini nga oras ukon nagapauli halin sa eskwelahan ukon pamatuod sang trabaho para sa mga nagatrabaho nga estudyante.
Ini suno sa iya agud malikawan ang mga gang sang mga pamatan-on nga maglapta sang kinagamo sa mga dalanon sa sini nga tini-on kag agud masiguro nga ang mga pamatan-on makapauli nga luwas sa ila mga puluy-an.
Samtang, bilang kabahin sang pila ka mga tikang sang ahensya agud labi pa nga mabuhinan ang krimen sa pungsod, natalana man nga dakpon sang mga otoridad ang mga pamatan-on nga nagalapas sa sini nga polisa.
