ROXAS CITY – Balik presuhan ang isa ka ex-convict matapos naaresto sa buy bust operation sang Station Drug Enforcement Team sang Roxas City PNP sa
Sitio Mason, Barangay Banica, Roxas City.
Ginkilala ang drug suspek nga si Barsa Barsa alyas Dodoy Barsa sang nasambit nga lugar.
Nakuha sa posesyon ni Barsa ang 16 ka sachet sang shabu, tatlo ka sachet sang marijuana seeds kag tatlo ka sachet sang marijuana leaves, P1,000 nga buy bust money, cellphone kag drug paraphernalia.
Sa exclusive interview sang Bombo Radyo Roxas kay Police Lt. Col. Dante Tayco, hepe sang Roxas City PNP, ginpahayag sini nga madugay ang ila ginhimo nga monitoring kay Barsa antes ginpatigayon ang operasyon.
Aminado si Tayco nga medyo nabudlayan sila nga maka-transaksyon si Barsa, bangud wala ini nagabaligya sang droga sa indi niya kilala.
Samtang ginabulubanta nga nagalab-ot sa P94,000 ang market value sang nakuha nga shabu sa drug suspek magluwas pa diri ang marijuana leaves kag seeds nga narekober kay Barsa.
