ROXAS CITY – Balik-presuhan ang isa ka ex-convict matapos madakpan sa ginkasa nga drug buybust operation sang Provincial Drug Enforcement Unit (PDEU) sa Barangay Inzo Arnaldo, Roxas City.
Ginkilala ang suspek kay Johnar Cadiz, 39 anyos, residente sang Barangay Bunga, Panay, Capiz.
Sa interview sang Bombo Radyo kay PDEU team leader Police Lieutenant Colonel Julius Balano, madugay nila nga ginpaidalom sa monitoring ang nasambit nga suspek nga ginapahayag nagakuha pa sang suplay sang ilegal nga droga sa siyudad sang Iloilo.
Nahibaluan nga naaresto na sadto sa probinsiya sang Aklan ang suspek apang na-released pinaagi sa plea bargaining.
Narekober sa suspek ang P1, 000 nga marked money, kag duha ka sachets sang shabu nga ginabulubanta nagabalor P13, 000.
Magapangatubang ang suspek sa panumbungon nga paglapas sa Republic Act 9165 ukon Comprehensive Dangerous Drugs Act of 2002.
