Ginpatpat sang isa ka legal expert kun paano mas makapalapad sang suporta para sa mga solo parents kag ila sini mga kabataan ang RA 11861 ukon Expanded Solo Parents Welfare Act.
Sa interview sang Bombo Radyo kay Atty. Gladys Gay Pagulong sang Integrated Bar of the Philippines – Capiz Chapter, iya ginpahayag nga nasambit nga layi ang ginapatuman agud mapasangkad ang benepisyo kag proteksyon para sa mga solo parent sa Pilipinas.
Suno kay Pagulong, ginakabig nga solo parent ang isa ka tawo nga naga-atipan sang bata nga wala sang kaupod nga partner bangud nga napatay na ini, nagbulagay, ukon gin-abandona.
Pahayag pa niya, importante nga pagkuha sang Solo Parent ID sa City ukon Municipal Social Welfare and Development Office agud magserbi nga pruweba agud ma-avail ang mga benepisyo nga ginahatag sang gobyerno.
Lakip sa mga benepisyo amo ang financial assistance, discounts, parental leave kag flexible work schedule agud mas mahatagan nila sang oras kag atensyon ang ila pamilya.
Dugang pa sang natungdan, dako ang papel sang komunidad sa pagbulig sa mga solo parent pinaagi sa paghatag sang suporta kag pag-intindi sa ila sitwasyon.
