Nagkulob ang ferry boat sang mga turista sakay ang 89 katawo sa kalalawran sang Nusa Lembongan, Bali sang Miyerkules sang hapon matapos gin-igo sang dalagkuan nga mga balud.
Sandig sa mga otoridad padulong kuntani ang ferry boat sa Sanur takna las-4:30 sang hapon sang ini ang nagkulob.
Sa video nga nagalapta sa social media makit-an nga nagasinggitan ang mga tao samtang pilit nila nga ginaguba ang mga bintana agud makaguha. Pila sa ila naglumpat pa sa dagat samtang ang yara sa mga kalapit nga bangka ang gilayon nga nagbulig gamit ang mga pisi.
Sa kabilugan, 77 sa mga pasahero ang mga dayuhan ukon pangayaw kag 12man ang Indonesian kun sa diin tanan sila naluwas takna las-6:30 sang gabi, kag wala man sang nareport nga napatay ukon nag-angkon sang madalom nga mga pilas.
Samtang, temporaryo nga ginpadala ang mga divers agud masiguro nga wala sang may nabilin nga mga biktima sa idalom sang ferry boat matapos ini nga nagkulob.
Nahibaluan nga ang insidente natabo pila ka bulan matapos nalumos ang isa ka babaye nga Australian sang nagkulob man ang isa ka snorkeling boat sa Bali. Bangud sini, ginpahunumduman sang Australian government ang mga pumuluyo nga maghalong sa paglagaw sa Indonesia bangud sa peligro sang mga mabaskog nga balud kag indi safe nga mga sakayan pandagat.
