ROXAS CITY – Kadungan sa pagselebrar sang fire prevention month sa bulan sang Marso ginpatpat sang tagpamaba sang Bureau of Fire Protection ang mga pamaagi agud malikawan ang sunog.
Sa interview sang Bombo Radyo kay SFO2 Selvino Ross Alvino Jr. Culasi sub-station supervisor kag tagpamaba sang RCFS, ginsiling sini nga may mga nakalinyada na sila nga programa para sa bualn sang Marso.
Isa na diri amu ang pagrekorida kag pagpatigayon sang “Oplan ligtas na Pamayanan” kun sa diin nagapabati sang mga mensahe sa mga pumluyo sang mga dapat kag indi dapat himuon agud malikawan ang halit sang sunog.
Naga-apelar man ini sa mga kabarangayan nga hatagan sang nagakaigo nga pondo para sa pagbakal sang mga kagamitan agud malikawan ang sunog, bilang preparasyon.
Ginpahayag man sini nga isa sa mga tikang agud malikawan ang sunog, amu nga siguraduhon nga lisensyado kag otorisado ang nagatakod sang kuryente sa isa ka puloy-an.
Kinahanglan man nga gamiton ang nagakaangay nga klase sang wiring, ipahilayo ukon ilikaw sa mga kabataan ang mga kagamitan nga posible makahimo sang kalayo, sa paggamit sang kandila kinahanglan nga ibutang sa lugar nga indi masunogon, likawan nga mag-jumper, siguraduhon man nga antes magbiya sa panimalay, tsekyaron nga wala sang may nakasaksak nga kagamitan.
Ipabilin man nga matinlo ang hose line sang LPG agud malikawan ang sunog kag likawan ang pagsaksak sang extension wire sa isa pagid ka extension wire.
Suno diri nga sa oras sang insidente gilayon nga ipahibalo sa ila nga ahensya agud mahatagan sang aksyon.
