Abogada na ang anay empleyado sang Bombo Radyo matapos nagguha ang resulta sa 2024 Bar Examination.
Sa interview sang Bombo Radyo kay Atty. Rubilyn Lumagbas, Purisimian 2024 Bar Passer, ginpahayag nga una sini nakita ang iya apelyedo sa online result, wala ini gilayon nagpati tubtob nga nagtawag ang isa ka abyan nga naghambal nga siya ang nakapasar.
Ang pagkapasar ni Atty. Lumagbas, ang dako nga kabaylo sa tanan nga pag-antos kag sakripisyo sang tion nga nag-umpisa ini sa Law School tubtob nga nagkuha ini sang exam.
Mahibaluan nga ikaduha na niya ini nga pagkuha sang amo pasinawan apang wala ini nag-untat sa baylo mas nangin pursigido pa ini nga magkuha liwat.
Pahayag pa ni Lumagbas nga isa ang Bombo Radyo sa nakabulig sa iya sang dako sa mga idea kag ihibalo nahanungod sa layi bangud nangin isa man ini ka reporter, newswriter kag news director sa Bombo Radyo Roxas.
Dugang pa sang Abogada nga may mga tion nga siya ang nabudlayan kag nagapanumdom sa pag-give-up apang yara ang iya nga mga abyan nga nagaremind kag nagamotivate sa iya nga magpadayon kag indi madulaan sang paglaum.
Ginhimo man sini nga inspiration ang iya pamilya kag ang mga tawo nga na-agrabyado nga wala sang ikasarang sa pagbayad sang abogado.
“Nasakitan kag naluoy ako magtan-aw sa mga tawo nga nagahandum sang hustiya apang wala sang ikasarang” pahayag sini.
Nagpasalamat man si Lumagbas sa mahal nga maka-ako nga amo ang iya nangin kabakod sa pag-angkon sang iya kadalag-an.
Sa karon, bukas ini sa mga oportunidad nga magtrabaho natuhoy sa pagka-abogasya.
