Ipa-deport sang Timor-Leste government si Former Negros Oriental Third District Representative Arnolfo Teves Jr. sa rason nga nagapabilin ini sa nasambit nga pungsod nga wala sang valid visa kag legal authorization.
Ginpahayag sang tagpamaba sang gobyerno sa amo nga pungsod nga gilayon nila ipatuman ang nasambit nga desisyon.
Apang, suno sa abogado ni Teves nga si Atty. Ferdinand Topacio, gin-grant sang Court of Appeals sang Timor-Leste ang petisyon ni Teves para sa isa ka writ of habeas corpus.
Ginsiling ni Topacio nga ginmanduan ang mga otoridad sang Timor-Leste nga ipaatubang si Teves sa korte sa sulod sang 48 oras.
Nahibaluan nga si Teves ang ginatudlo nga nagapanguna nga akusado sa pagpatay kay Former Negros Oriental Governor Roel Degamo sadtong Marso 2023. Sumugod sadto, nag-request ini sang asylum sa Timor-Leste.
Sandig sa Facebook post sang anak ni Teves nga si Axl sini nga Miyerkules sang aga, gin-aresto ang iya amay sang mga immigration officer sa Timor-Leste.
Ginaalegar nga wala sang ginpakita nga warrant ukon anuman nga dokumento sa oras sang pag-aresto.
Base naman sa report sang local media nga hatutan.com, gin-aresto si Teves kag ginpahamtang sa kustodiya sang immigration police sa Timor-Leste.
