Indi na madayon sa masunod nga semana ang naka-schedule na kuntani nga hearing ni former House Speaker Martin Romualdez sa Independent Commission for Infrastructure.
Sa advisory, ginpahayag sang Independent Commission nga naghingyo si Romualdez nga i-postpone ang hearing nga natalana kuntani sa Oktubre 22 bangud mapaidalom ang mamalidha sa medical procedure.
Dugang pa sang komisyon, mapaguwa lang sila sang dugang nga advisory sa tion nga may yara na sang bag-o nga petsa para sa masunod nga hearing ni Romualdez.
Apang kahapon, gin-anunsyo ni ICI Executive Director Brian Keith Hosaka nga sa Myerkules, sa masunod nga semana, ang hearing ni Romualdez.
Nahibaluan nga sang nagligad nga semana, nagbisita si Romualdez sa ICI office sa Taguig kasunod sang imbitasyon sa iya sang komisyon para sa closed-door hearing.
Suno kay Hosaka, wala sang may gin-angot nga personalidad si Romualdez sa ginaaleagr corruption scheme sa iya affidavit apang may mga ginpangalanan siya nga mga lawmakers nga ginaalegar naangot sa pagdihon sang national budget.
Ginpanginwala man ni Romualdez ang alegasyon nga nagabaton siya sang kickbacks halin sa flood control projects.
Nagpabutyag ang mamalidha nga handa ini nga buksan sa publiko ang iya Statement of Assets, Liabilities, and Net Worth (SALN).
