Ginpakigbahin sang isa ka sugarcane farmer kag tag-iya sang katubohan sa Bayawan, Negros Oriental, ang iya pamaagi sa pagpugong sang Red-Striped Soft Scale Insect (RSSI) nga nagahalit sa tubo.
Sa interview sang Bombo Radyo kay Mr. Solomon Pagunsan, iya ginpahayag nga gin-una niya ang pagkuha sang mga dahon sang tubo nga ginatiniran kag ginakuhaan sang pagkaon sang RSSI.
Suno kay Pagunsan, ginpatuman niya ang iya gintawag nga full de-trashing, ukon pagpangtapas sang mga dahon sang tubo halin sa idalom tubtob sa ibabaw sini.
May yara ini sang 18 tubtob 20 ektarya nga katubohan kag indi sini luyag nga mapabay-an ini samtang may nagaatake nga RSSI.
Pahayag niya, kun wala na sang dahon nga matagoan ang RSSI, mas mahapos nga maigo sang init sang adlaw ang mga peste kag mahimo ini magresulta sa ila pagkapatay.
Aminado si Pagunsan nga nakabatyag siya sang stress sang una nga natukiban nga may RSSI sa iya katubohan apang sa subong, naka-survive na ang iya pananom.
