Nangin maayo ang pagsugod sang Gilas Pilipinas sang ila nga training camp para sa third window sang 2025 FIBA Asia Cup Qualifiers.
Sang Martes, nagsugod ang ila nga training sa Inspire Sports Academy sa Laguna.
Kalakip sa ginapreparahan sang national basketball team amu ang exhibition games nila sa Doha, Qatar.
Pila sa mga nagtambong sa nasambit nga ensayo amu sanday Dwight Ramos, AJ Edu, RJ Abarrientos, Ralph Cu, Carl Tamayo, kag Kevin Quiambao.
Kalakip man nga nagtambong sanday assistant coaches Sean Chambers kag Richard Del Rosario subong man si Alfrancis Chua.
Sa adlaw sang Biyernes magasugod ang friendly games samtang sa Pebrero 20, makaatubang nila ang Chinese Taipei samtang ang New Zealand naman sa Pebrero 23.
Matandaan nga sigurado na ang pagsulod sang Gilas Pilipinas sa FIBA Asia Cup nga pagahiwaton sa Saudi Arabia sa bulan sang Agosto matapos nga maangkon ang 4-0 win-loss record sa Group B.
