ROXAS CITY — Ginmanduan na sang Department of the Interior and Local Government – Capiz Provincial Office si Barangay Kagawad Felimon Apolinario sang Barangay Tacas, Pontevedra, Capiz nga amo ang magpungko bilang kapitan sang barangay.
Ini ang kasunod man sang mando sang Office of the Ombudsman nga i-dismiss si anay punong barangay Junar Bautista sa iya palangakuan matapos mapamatud-an ini sang ahensiya nga guilty sa kaso nga grave misconduct sa ginpasaka nga kaso batuk sa iya sang pila ka mga residente may kaangtanan sa maanomalya sini nga implementasyon sang Emergency Shelter Assistance ukon ESA program.
Sa duha ka pahina nga memorandum sang DILG para kay Apolinario nga pirmado ni Bienvenido Acevedo Jr., OIC sang opisina sadtong Mayo 9, gintumod sang opisina ang probisyon sa Sec. 44 (b) sang Local Government Code of 1991 nga kun may yara sang permanent vancancy sa palangakuan sang punong barangay, magatal-os diri ang number 1 nga kagawad sang barangay.
Mahimo naman nga makapangalagad si Apolinario bilang punong barangay pagkatapos nga makasumpa siya sa palangakuan.
Mahibaluan nga sa consolidated resolution nga ginpaguha sang Ombudsman sa kaso ni Bautista, kalakip man sa ila ginapasabat ang pila ka mga himata sang anay opisyal.
Ginrekomendar man sang Ombudsman nga mapasakaan sila sang kaso kriminal bangud sa ila paglapas sa Sec. 3 (e) sang RA 3019 ukon Anti-Graft and Corrupt Practices Act.
Magluwas sa dismissal, ginpapanaugan man si Bautista sang accessory penalties nga cancellation of eligibility, forfeiture of retirement benefits kag perpetual disqualification to hold public office.
