ROXAS CITY – Ginkumpirmar ni Board Member Jonathan Besa nga ginabawi na sang tag-iya ang duta nga ginahamtangan sa karon sang dialysis center sa Barangay Salong, banwa sang Tapaz.
Ang nasambit nga duta amu ang gintukuran sang anay Tapaz District Hospital kag sa karon dialysis center na.
Sa interview sang Bombo Radyo kay Besa, ginsiling sini nga nakabaton sila sang sulat nagikan sa tag-iya sang duta nga nagahinyu sa Sangguniang Panlalawigan nga maghimo sang isa ka resolusyon nakasaad nga ginabalik na ang duta sa orihinal nga tag-iya, gani ginpakamaayo nalang nga i-refer sa Provincial Legal Office.
Gin-aku man sini, nga pila ka bulan matapos ang hinyu sang tag-iya, nakabaton sila sang subpoena kalakip na ang Provincial Legal Office kag LGU-Tapaz agud mabawi ang nasambit nga duta.
Aminado si Besa nga wala sang deed of donation ang duta kundi Memorandum of Agreement (MOA) lang sa tunga sang LGU-Tapaz kag anay Gobernador Contreras nga nagatugot nga himuon nga isolation facility ang anay hospital kadungan sang kasagsagan sang COVID-19 pandemic.
Dugang pa ni Besa, nga hulaton na lang ang mangin desisyon sang korte.
