SAPIAN CAPIZ – Arestado ang ginakabig High Value Individual (HVI) matapos ang ginkasa nga drug buybust operation sa Barangay Majanlud, Sapian Capiz.
Sa interview sang Bombo Radyo sa hepe sang Sapian Municipal Police Station nga si PCapt. Merry Chris Dela Cruz, ginpahayag sini nga ang nasambit nga arestado ang ginkilala kay alyas “Tibo”, 51-anyos, empleyado sang Municipal Social Welfare and Development Office (MSWDO) kag residente sang Sitio Malinong sa amu nga banwa.
Suno kay Dela Cruz nga madugay na nila nga ginamonitor ang akusado tubtob natigayon ini nga madakpan pinaagi sa isa ka pulis nga nagpakuno-kuno pusuer buyer.
Nakuha sa nadakpan ang 5 tanan ka sachets sang ginapatihan shabu nga may kabug-aton 1 ka gramo kag may Standard Drug Price nga P9,000.00 kag P500 nga buybust money.
Kaso nga paglapas sa RA 9165 ukon Comprehensive Dangerous Drugs Act of 2002, ang paga-atubangon ni alyas “Tibo”.
Sa karun, yara na ini sa paghinakop sang Sapian MPS para sa nagakaigo nga disposisyon.
