ROXAS CITY – Natandog ang balatyagon sang isa ka ginang sang nakita sini ang isa ka menor de edad nga nakapalagyo sa Arellano KTV bar sa Arellano Street, Roxas City rasun nga iya ini ginbuligan.
Suno kay Flory May Aragon sang Arnaldo Boulevard sining siyudad, ginsaysay sa iya sang biktima nga naggikan ini sa Barangay Bugtong, Daraga, Albay kag gintanyagan sang suspetsado nga si Gester Ledesma sang Iloilo City nga magatrabaho sa syudad sang Roxas bilang isa ka serbedora sa bar rason nga nag-upod man ini.
Apang ginkakibot na lamang sini sang iya pag-abot sa syudad ginpatrabaho ini bilang isa ka commercial sex worker sa amo nga bar.
Ginpahayag ni Aragon nga ginareklamo sang biktima ang pagpalanakit sang mga pribado nga parte sang iya lawas bangud sa ginahimo sang mga lalaki nga nagagamit sa iya.
Suno pa kay Aragon, nagpadulong sa Arnaldo Boulevard ang biktima agud pangitaon ang anay customer sini nga nagpasalig nga buligan siya nga makahalin sa bar.
Bangud diri ginpakamaayo sang ginang nga idangop sa Bombo Radyo ang natabo agud mapalab-ot sa mga otoridad sa siyudad kag mabuligan ang biktima.
Gintuad man sang biktima kay Aragon nga magluwas sa biktima, may mga kaupdanan pa siya nga menor de edad sa bar nga luyag man niya nga ma-rescue.
