ROXAS CITY – Patay ang 51-anyos nga ginang matapos naghikog sa sulod sang CR sang ila balay sa Sitio Mangga, Barangay Lanot, Roxas City.
Nasapwan ang nagabitay nga biktima nga si alyas Rona Mae sang live-in partner nga magamit kuntani sang CR.
Sa interview sang Bombo Radyo sa bayaw sang biktima, nakibot na lamang ini sang nakabati nga nagapangayo sang bulig ang utod sa diin naabtan nga ginabuligan ang iya bayaw nga nagatsikog na kag may higot sa liog.
Ginklaro man sang bayaw nga wala sang kamatuoran nga naghikog ang biktima matapos ginaalegar wala nakabaton sang social amelioration program (SAP) bangud duha sila sa ila balay ang nalakip sa listahan kag nakabaton sang cash assistance sang gobyerno.
Indi man mapat-ud sang bayaw ni alyas Nene kun ano ang nagtulod sa biktima para utason ang kaugalingon nga kabuhi, apang kahapon nagmuno na ini sa live-in partner nga luyag magpauli sa ila balay sa Barangay Agbay-ang, Dumalag agud matsekyar ang ulumhan.
Wala man ini ginapunggan nga magpauli sang live-in partner apang nagpanugyan nga tan-awon anay kun may nagabiyahe na nga salakyan.
Magluwas diri, nakamuno man ang biktima nga luyag na sini nga makaangkon sila sang anak sang live-in partner, apang indi lamang sigurado kun mabugayan bangud may edad na ini sang nagpangasawa.
