ROXAS CITY – Nagpaathag ang isa ka empleyado sang Public Attorney’s Office (PAO) sa banwa sang Mambusao natuhoy sa naglapta nga video kun sa diin nakabais sini ang isa ka traffic auxiliary sa Burgos Talipapa, Burgos Street, Roxas City.
Suno kay Mildred Galagate, nag-abot siya sa amo nga lugar kag gin-hazard ang iya salakyan kag wala sini ginpatay ang iya salakyan sang ginpahamtang ini sa kilid bangud nagdali-dali lamang siya sang bakal sang baboy sa nasambit nga merkado.
►TMU, handa magpatunga agud mahusay ang traffic auxiliary kag ginang nga nakuhaan sang video nga nagbaisay sa Burgos Street
Sang ini ang nagahulat sang iya ginabakal, ginpalapitan ini sang isa ka traffic auxiliary nga si Jonee Alabot kag ginhambalan nga isaylo ang iya salakyan sa natuo nga porsyon sang karsada bangud yara ini sa nawala nga bahin nga ginadumilian sa pag-parking.
Apang suno kay Galagate, naghambal lamang siya nga madasig lamang ini bangud may ginbakal lang apang wala ini mahangpan ni Alabot kag gintawag siya nga ‘bundol’.
Bangud sa amo nga tinaga, nakasabat man ang ginang kay Alabot tubtob sa nag-init na ang ila pagsabtanay.
Suno diri nga nakahanda man siya nga ihatag ang iya lisensiya kay Alabot sa baylo nga makapakita lamang ini sang iya ID, butang nga wala mahimo sang nasambit nga traffic auxiliary.
Aminado man ang ginang nga nakatuad siya sang malain nga tinaga kay Alabot sang tion nga ginbangil sini ang iya lawas sa salakyan.
Gindugang pa sini nga dugang pa siya nga naakig sang nasarangan siya nga matuklod ni Alabot apisar isa ini ka babaye.
Suno kay Galagate nga naghinalaay sila ni Alabot sa Roxas City Police Station kag didto nagpatawaray man ang mga ini.
Apang nakibot na lamang ini sang gintundaan siya nga nagpa-blotter pa si Alabot natuhoy sa natabo.
