Naguba ang pila ka pamalay kag poste bangud sa pagpalanasa sang ginapahayag buhawi sa Barangay Agambulong, Jamindan, Capiz.
Ini ang ginkompirmar ni Punong Barangay Jose Caro sang mainterview sang Bombo Radyo.
Ginpahayag ni Caro nga kalakip sa mga balay nga nagkalasamaran amo ang balay nga ginapanag-iyahan nanday Yonila Vasquez kag Sanito Flores, lunsay mga residente sang amo lugar.
Suno kay Caro nga magluwas sa mga nahalitan nga pamalay, nagkalatumba man ang mga kahoy kag naghilay ang mga poste sa lugar.
Gindugang pa sini, nga may pila ka mga na-stranded nga pampasahero nga bus bangud wala nakalusot sa dalan bangud sang mga nagkalatumba nga mga kahoy sa karsada.
Ginpahayag man ni Caro nga nadula man sang makadali ang suplay sang kuryente sa lugar bangud sang mga poste nga naghilay.
Mahibaluan nga kapin 10 minutos nga nagdugay ang nasambit nga buhawi kadungan sang pagbubu sang mamunog nga ulan.
