Kapin 500 ka mga job opportunities sa Austria ang gintanyag sa mga Filipino skilled worker nga nagapangita sang trabaho sa iban nga pungsod sa Philippines–Austria Jobs Fair nga ginhiwat sa isa ka mall sa Quezon City sang Martes.
Ginpangunahan sang Department of Migrant Workers (DMW) ang kahiwatan sa bulig sang Embassy of Austria sa Manila, agud i-plastar sang mayad ang mga kwalipikado nga Filipino talents sa mga oportunidad sa trabaho sa iban nga pungsod.
Sa isa ka social media post sang DMW, ginpahayag nga yara sa walo ka mga pribado nga recruitment agencies ang nagpartisipar, kun sa diin nagtan-ay sang 546 ka mga job orders sa Austria sa nanari-sari nga sahi sang industriya nga ginakaalakipan sang sa healthcare, hotel and restaurant, customer services, kag iban pa.
Kabahin sang kahiwatan ang isa ka pre-employment orientation seminar agud tudluan ang mga aplikante hanungod sa mga reyalidad sang pagtrabaho sa iban nga pungsod samtang ginahatagan sang pagtamod ang importansya sang paglikaw sa illegal recruitment kag human trafficking.
Ginsiling sang DMW nga ang inisyatiba ang nakabase sa malapad nga katuyuan sang gobyerno nga makahatag sang insakto kag nagakadapat nga trabaho para sa mga Pilipino sa abroad kag nagapakita man ini sang mabakod nga labor cooperation sa tunga sang Pilipinas kag Austria.
