ROXAS CITY – Ginpasakaan sang kaso nga graft and corruption sa Office of the Ombudsman ang gobernador sang probinsiya sang Capiz sa paghire sa security firm sang utod nga si Mrs. Carmen Andrade nga ginaalegar wala nag-agi sa public bidding.
Ginpasaka ang nasambit nga kaso ni Mr. Essex Quintia sang Poblacion Ilaya, Dao, Capiz sadtong Disyembre 17, 2018.
Ginhinyo ni Quintia sa Ombudsman nga imbestigahan ang ginaalegar iligal nga kontrata nga ginsudlan sang gobyerno probinsiyal sang Capiz sa diin ginkuha sini ang Perlite Security Agency nga ginapanag-iyahan sang utod sang gobernador
Magluwas diri ginhinyo man sini nga ipaidalum sa preventive suspension ang gobernador samtang gina-imbestigahan ang nasambit nga kaso.
Nagapati si Quintia nga may liabilidad si Governor Antonio del Rosario sa paglapas sa RA 3019 ukon Anti-Graft and Corrupt Practices Act in relation sa RA 9184 ukon Government Procurement Reform Act.
