Ginkompirma ni Presidential Anti-Organized Crime Commission (PAOCC) Spokesperson Winston Casio nga nag-request na ang gobyerno sa International Criminal Police Organization (Interpol) nga mag-issue sang red notice batok kay anay Presidential Spokesperson Atty. Harry Roque.
Suno kay Casio, mangin mabudlay ang proseso bangud sa ginapakita kag ginapahamtang ni Roque nga isa siya kuno ka biktima sang “political prosecution.”
Pahayag pa niya, wala sang basehan ang mga pahayag ni Roque kag tanan nga proseso nagasalig sa mga pisikal nga ebidensya batok sa iya.
Madumduman nga sang bulan sang Mayo, nagpagwa sang warrant of arrest ang mga otoridad batok kina Roque, Lucky South 99 representative Cassandra Li Ong kag 48 pa nga iban para sa qualified trafficking kag iligal nga operasyon sang Philippine Offshore Gaming Operations (POGO).
Dugang pa sang PAOCC, nakakuha sila sang ebidensya nga nagapakita sang matuod-tuod nga human trafficking sa sulod sang Lucky South 99, lakip na ang torture, kidnapping, kag sex trafficking, nga nagresulta sa pagluwas sang indi magnubo sa 158 ka mga empleyado.
Nahibaluan nga una na diri nga ginpanginwala ni Roque ang mga akusasyon kag naginsister nga wala siya sang labot sa operasyon sang Lucky South 99.
