ROXAS CITY – Ginklaro sang tagpamababa sang provincial government nga maayo na ang kondisyon sang gobernador matapos nga nadanlog samtang nagadul-ong sang una nga 100 diyas nga pagpanerbisyo sa probinsya sang Capiz.
Sa interview sang Bombo Radyo kay Atty. Luvim Amores ginsiling sini nga bangud sa kapin 2 ka oras nga pagtinindug, nakabatyag sang kakapoy si Governor Fredenil Castro kun sa diin ginahulag-hulag sini ang iya nga tiil agud indi mabatyagan ang kakapoy apang, nadanlog ini rason sang iya pagkatumba.
Matandaan nga tubtob sa karon nagapa-ayo pa ang gobernador matapos nga may naipit nga ugat sa iya lowerback ukon sciatica rason nga nabudlayan ini maglakat.
Suno kay Amores, matapos ang insidente gintsekyar ini ni Dr. Alex Nolasco kag wala naman sang nabatyagan nga lingin sang ulo ukon napilasan.
Dugang pa sini, nga antes pa maglakat ang gobernador, ginsiguro pa siya ni Gov. Castro nga mabisitahan na ang mga coastal areas kag mahatagan sang ayuda ang mga apektado sang red tide.
Gindayaw man sini ang gobernador bangud sa dedikasyon sini kag palangga sa pagserbisyo sa mga pumuluyo sang Capiz.
