ROXAS CITY – Nagpatawag sang emergency meeting si Governor Esteban Evan Contreras kasunod sang isa ka Persons Under Investigation (PUIs) sang Novel Coronavirus sa probinsya sang Capiz.
Gintipon sang gobernador ang magkatuhay nga ahensya sang gobyerno nga ginlakipan sang PNP, Philippine Ports Authority, Civil Aviation Authority Philippines (CAAP), health sector, hospital administrators, chiefs of hospitals, response units sang Provincial Disaster Risk Reduction and Management Office, kag iban pa, agud pabakuron ang surveillance, monitoring kag pagpatigayon sang preventive measures sa probinsya batuk sa nCoV.
Ini ang ginpahayag ni Capiz Provincial Health Officer II Dr. Samuel Delfin sang mainterview sang Bombo Radyo Roxas.
Suno kay Delfin nga pananglitan magdugangan ang Persons Under Investigation (PUIs), ang Roxas Memorial Provincial Hospital (RMPH) ang may kapasidad diri nga maghandle, apang sa tion nga magdamo ang mga pasyente pagadal-on ini sa Senator Gerardo Roxas District Hospital sa banwa sang Dao.
Samtang naga dependi naman sa mga pasyente kun sa pribado nga ospital sila magapabulong.
Gintalakay naman sa pagsinapol kun paano i-handle ang mga pasyente nga PUI kag Persons Under Monitoring (PUM) nga may yara sang protective gear nga gamiton ang mga nurses kag doktor.
Plano sang probinsya nga magbakal sang mga personal protective equipment agud may yara sang gamiton ang mga nurses sa pagbantay sa mga pasyente.
Igapaidalom naman sang probinsya sa training ang mga nurses kun paano i-handle ang mga PUI’s agud indi na maglapta ang virus.
Apang sa tion nga magpositibo ang pasyente pagadal-on ini sa Western Visayas Medical Center sa bahin sang Iloilo.
Gintugyan naman sa PDRRMO ang pagtransfer sa mga pasyente sa tion nga magpositibo ini sa 2019 Novel Coronavirus.
Ginklaro ni Delfin nga sa Miyerkules pa mahibaluan ang resulta sang ginpadala nga specimen sang PUI sa Metro Manila.
