ROXAS CITY – Gin-athag sang Gobernador sang Capiz nga wala ginadalukan ukon wala sila nagapugong sa mga Local Government Units (LGU’s) nga magkuha sang COVID-19 vaccine sa provincial government.
Ini ang ginklaro ni Governor Esteban Evan Contreras, II sang mainterview sang Bombo Radyo.
Suno diri, kabaliskaran ini sa nagaguwa nga pahayag sa social media nga ginalimitahan sang gobyerno probinsyal ang LGU sa pag-request sang bakuna.
Sa pagkamatuod suno diri, nagahulat gid lamang ang bakuna nga kuhaon sang mga LGU’s sa storage facility nga nahamtang sa Capiz Provincial Health Office.
Dugang pa sang gobernador nga bastante katama ang bakuna ilabi na nga madamo ang nag-alabutan sa probinsya nga nagikan sa national government.
Pangabay ni Contreras, nga indi pagbaliskaron ang gobyerno-probinsyal nga nagadalok sang bakuna, mas maayo suno diri nga magbakal ang LGU sang ila kaugalingon nga ultra-low freezer agud maka-request sang madamo nga supply sang bakuna sa national government bangud suno diri, ginapagustuhan na ang probinsya sa pagrequest sang vaccine.
Sa pihak nga bahin, ginkalipay ni Contreras nga may yara sang LGU nga ginasunod sa pagkuha ang ila alokasyon nga bakuna, rason nga padayon ang ila vaccination rollout sa ila mga pumuluyo.
Ginbalita man sang gobernador nga sa masunod nga semana, magasugod na ang pagbaton sang Walk-ins sa mga District Hospitals kag plano nga pagalibuton ang mga upland barangays.
Panawagan ni Contreras nga magpabakuna ang mga Capiznon agud madali nga malab-ot sang probinsya ang herd immunity.
