ROXAS CITY – Kalalat-an ang nadangatan sang isa ka 16-anyos nga estudyante makaligad nga bulos bulos nga himuslan sang lima ka mga lalaki nga ginalakipan sang tatlo ka menor de edad kag duha nga yara sa legal age matapos mag-inum kaupod ang abyan sa isa ka banwa sa probinsiya sang Capiz.
Sa eksklusibo nga interview sang Bombo Radyo Roxas kay Che-Che, bestfriend sang biktima nga si alyas Marie, ginpahayag sini nga gin-upod sila sang ila abyan nga lalaki nga si Cyril sa gintambungan nga birthday party.
Diri sila nagkakilala sang mga suspek nga nagkumbinse sa ila nga maghalin sa iban nga lugar para mapadayon ang ila nga pag-inum
Matapos nakalab-ot sila nga pito sa pumping station ginpadayon nila ang pag-inum apang sa tuman nga kahulugbon nanday Alyas Marie kag Che-Che natulugan ang duha.
Nakabugtaw lamang si Che Che sang makabati ini sang paghulag sang katre nga ginsundan sang mga paghibi kag pagpangayo sang bulig ni Alyas Marie.
Mabangon kuntani si Che Che para buksan ang suga apang ginpunggan ini ni Cyril apang nagpanginpadlos ini rason nga iya gid nabuksan ang suga.
Suno kay Che Che nakita sini nga nakatungtong na sa abyan ang 14-anyos nga si Jud kag ginauyatan sang iban nga mga lalaki ang kamot kag tiil ni Alyas Marie, agud indi ini makahulag.
Sa kaakig sa nasaksihan, ginsumbag ni Che Che ang mga suspek nga gilayon nagguwa sa pumping station.
Ginbuligan ni Che Che nga makailis ang abyan kag nagpadul-ong ang duha sa banwa sang President Roxas, Capiz kag nagdiretso sa istasyon sang pulisya kag ginreport ang natabo sa ila.
