Nagpahanumdom ang isa ka health expert sa importansya sang pag-angkon sang ihibalo kag paghangop sa mga indibidwal nga may down syndrome.
Sa interview sang Bombo Radyo kay Dr. Maricel Almalbis, Medical Officer III sa Department of Pediatrics sang Roxas Memorial Provincial Hospital, iya ginpahayag nga ang Down Syndrome isa ka genetic nga kondisyon nga natabo kon ang isa ka bata may dugang nga chromosome 21, ukon ginatawag nga Trisomy 21.
Suno kay Dr. Almalbis, wala sang bulong nga makapadula sang Down Syndrome, apang may ara sang nagkalain-lain nga therapy pareho sang speech, occupational kag physical therapy nga nagabulig gid sa pagpauswag sang abilidad sang bata.
Pahayag pa niya, importante man ang early check-up kag early intervention bangud ini nagahatag sang mas daku nga kahigayunan sa bata nga matun-an ang mga kinahanglanon nga abilidad sa adlaw-adlaw nga pagpangabuhi.
Nahibaluan nga ginaselebrar ang National Down Syndrome Awareness month agud makabulig pa intindi sa publiko nahanungod sa nasambit nga disorder.
Nagpanawagan man ang natungdan sang pag-intindi, pag respeto kag pagpalangga bangud ang mga indibidwal nga may down syndrome ang kaangay lang sang normal nga tawo nga may balatyagon.
INTERVIEWED BY: BOMBO VINZ DEOCAMPO
